د کابل په پغمان ولسوالۍ کې ناپېژاندو وسله والو د لوګر ولایت یو تن اوسېدونکی منګل احمدزی له تښتولو وروسته په چاقوګانو وهلی او په بې رحمانه توګه یې وژلی دی
د وژل شوي ځوان نږدې دوستان او د کورنۍ غړي وايي، چې ناپېژاندو کسانو د عرفې په ورځ منګل احمدزی تښتولی او وروسته یې وژلی دی.
د مقتول د خپلوانو او نږدې دوستانو د مالوماتو له مخې، منګل احمدزی د عرفې په ورځ له تښتول کېدو وروسته د اختر تر دویمې ورځې پورې نادرکه و او کورنۍ یې په بېلابېلو سیمو کې د هغه د موندلو پراخې هڅې کولې. خو نن سهار د دغه ځوان بې ساه جسد په کابل کې د عدلي طب په مرکز کې وموندل شو.
دوی وايي "د منګل احمدزي پر مخ او بدن د چاقو د بریدونو ګڼې نښې لیدل کېدې او داسې ښکاري چې هغه د اختر په لومړۍ ورځ وژل شوی وي. وسله والو د هغه موټر، نغدې پیسې او ګرځنده ټیلیفون هم له ځان سره وړي دي."
د دغه ځوان بې ساه جسد نن د لوګر ولایت، محمداغې ولسوالۍ په سرخ اب سيمه کې خاورو ته وسپارل شو. د سیمې د خلکو په وینا، تر دې وړاندې د نوموړي مېرمن هم په یو بل برید کې وژل شوې وه.
د قرباني نږدې دوستان ادعا کوي چې منګل احمدزی په سیمه کې یواځینی قرباني نه دی، بلکې په وروستیو میاشتو کې ورته نورې پېښې هم شوې دي. د دوی په وینا، طالبان هم دوی ته خبر ورکړی و چې د پغمان په غرنیو سیمو کې د څو نورو کسانو جسدونه موندل شوي، چې ځینې یې د اوږدې مودې تېرېدو له امله زیانمن شوي او ځنګلي حیواناتو خوړلي وو.
د سیمې اوسېدونکي وايي، د دغو ټولو پېښو په اړه معلومات په پراخه کچه نه دي خپاره شوي؛ ځکه طالبانو د دغو جنايي پېښو د رسنیز کېدو مخه ډب کړې ده او د پېښو په پټولو سره غواړي د امنیت د خوندیتوب ادعا وکړي.
د قرباني کورنۍ، خپلوانو او ملګرو په کلکه غوښتنه کړې چې د طالبانو امنیتي بنسټونه دې د دې پېښې هر اړخیزه څېړنه وکړي، د دغه وحشیانه قتل عاملان دې وپېژني او د قانون منګولو ته دې وسپاري.
دا په داسې حال کې ده چې د کابل په ګډون د افغانستان په ټولو ولایتونو کې ورته وژنې او قتلونه ورځ تر بلې زياتيږي او څوک نشته چې يې پوښتنه وکړي، ځکه طالبان ټولې قضيې د خپل دروغځن امنيت لپاره پټې ساتي.
#ABN | #KabulCrime | #Paghman | #Logar | #TargetKilling | #SecurityInAfghanistan